"Cекыт улон адӟи ке но, ӝожтӥськыны муге ӧвӧл"

В Балтаси

Вордскем нуналаз Марфа Фёдоровналэн нырысь ик аслэсьтыз семьязэ, пичи дырзэ тодаз ваемез потӥз. Валамон но — анай-атай, семья котькуд арлыдын но самой матысь адямиос луо ук, юбиляр ас мылкыдъёсыныз милемын но воштӥськиз.

— Семьяямы ми вить кузя нылпиос вал. Одӥг выны Бадӟым Лӧзя I люкет гуртын улӥз, кулэмын ини. Бадӟым агае вазь ик кулӥз, 48 аресэн. Апай но, сузэры но 80 ареслэсь ортчыса кулӥзы… Туннэ нуналэ мон огнам гинэ кыли ни… Вить ӵошен вал ке но, анай огместы но мултэс ӧз кары, ваньместы утиз, ӧз кушты, ӧз кельты. Солы туж секыт вал ке но, ваньзэ чидаз. Атае жугиськонын кулӥз, 35 аресэн анай огназ вить нылпиосыныз кылиз, — синкылиоссэ вормыны быгатытэк, мадиз Марфа Фёдоровна.

Бен, туннэ нуналэ юбиляр матысь адямиосыз вӧзын шуныт юртын улэ, нош кӧня шуг-секытъёсты но ыштонъёсты солы адӟыны тупам улытозяз… Ваньзэ тодаз возе ке но, та нуналэ уродэз сярысь гинэ мадемез ӧз поты солэн. Вылын Ушма гуртын Марфа Фёдоровналэн вань улонэз орчем. Татын со вордскем, татын дышетскем, татын будэм но улэ. Жаляса верано, картлы со кошкымтэ, нылпи но вайымтэ.

— Инмарлы тау, секыт улон адӟи ке но, ӝожтӥськыны муге ӧвӧл. Нокытын монэ ӧз курлалэ. Ужан интыям но тырши, кивалтӥсьёслы пал кыл но ӧй вера (Мария Иванова мех фабрикаын ужам — Н.Ж.). Ми дыръя ужаны но секытгес вал… Луизы сыӵе дыръёс но, куке ӵукна куать часысен кутскыса уйин дас кык часозь ужамы, — валэктэ Марфа Фёдоровна, ас малпанъёсаз выйыса. — Нырысь ужан интые «Красный труд» шуыса нимаськиз, собере — «Стахановец», нош бератаз ини огшоры мех фабрика гинэ шуыса нимаськиз. Тодам вайыны кутски ке, паймисько: кызьы гинэ улӥськеммы но ужаськеммы меда? Нырысь сюресэз тодымтэ бере, йыромыса уйбыт пыдын доре бертон сюресэз утчаса ветлэм дыръёс но луизы… Ужлэсь ӧм кышкалэ. Азьло ужтэк пуконлэсь кышкаськомы вал. Али улон туж умой ини, вань кадь каньыллыкъёс кылдытэмын. Тани югыт но шуныт юртын улӥсько, улы но улы гинэ, Инмарлы тау.

Марфа Фёдоровна вынызлэн пиеныз но солэн семьяеныз улэ. «Соослэн утеменызы мон туннэ пересьмонме туж шудо но каньыл ортчытӥсько. Инмарлы тау ваньмызлы но», — пальпотэ нылкышно.

Юбилярез ӟечкыланы вуэм куноос — Балтась районлэн главаезлэн воштӥсез Наиль Сабирзянов, социальной дурбасьтонъя отделлэн кивалтӥсез Алсу Гатиятуллина, Покчи Лӧзя гурт поселенилэн кивалтӥсез Сергей Мухин, «Сурнай» обществолэн валтӥсь агрономез Фарид Мухамметзянов — Марфа Фёдоровналэн визьмо вераськемезлы, задор мылкыдо луэмезлы паймизы но, синмаськизы но.

— Син медаз усьы, туннэ нуналэ пыд йылады ветлӥськоды, милемыз пумитаны но быгатӥды. 90 аресэ вуыса, ваньзы сыӵе задор луэменызы ушъяськыны уг быгато… Али кема аръёс ӵоже улонысь ӟечсэ гинэ адӟыса, шудо но таза луыса улыны мед кылдоз Тӥледлы, — шуиз Наиль Нургаязович. Нош Сергей Анатольевич ватсаз: «Марфа Фёдоровна, поселенилэн, гуртлэн улоназ котьку мыло-кыдо пыриськиды. Со понна Тӥледлы бадӟым тау шуэме потэ. Пересьмон даурды каньыл мед ортчоз». Таӵе кылъёсты вераса, солы РФ-лэн Президентэзлэсь ӟечкылан открытказэ, район главалэсь Таукарон гожтэтсэ, сяська керттэт но мукет кузьымъёсты сётӥзы.

Марфа Фёдоровналэн мылкыдыз бугырскиз, синкылиосыз адскизы. Но ассэ кияз кутыса, со куноосты келяны быгатӥз.

— Туж бадӟым тау лыктэмдылы, монэ ӟечкыламдылы. Бӧрдэмелы эн пайме ни, вождэс но эн поттэ, мон сыӵе бӧрдӥсь ини, — шуиз со, серекъяса но милемыз ӟыгыръяса.

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз

Все самые интересные и свежие новости в Балтаси
Материал: baltaci.ru

baltasi.ru