Покчи Лӧзя школаын актёръёс дышетско

Новости

21 коньывуонысен 28 коньывуонозь Покчи Лӧзя шоръёзо школаын театрлэн арняез ортчиз. Та нуналъёс куспын покчи классъёсысен кутскыса бадӟым классъёсозь котькуд класс спектакль пуктӥз.

«Театрлэн арезлы сӥзьыса, директормылэн, Эмиль Наилевич Гариповлэн кичӧлтэмезъя малпамы сыӵе ужрад ортчытыны. Одӥг арня ӵоже котькуд нунал кык класс аслэсьтыз дасям спектакльзэ учкисьёслы — дышетскисьёслы но дышетӥсьёслы — ӵектӥз. Нырысь покчи классъёс асьсэ тыршемзылэсь емышсэс возьматӥзы, собере — шор но бадӟым классъёс. Тросэз выжыкыл сюжетъёсты бырйилям, но вал пӧлазы туала школа улонэз, ӵош дышетскисьёслэсь кусыпъёссэс возьматӥсьёсыз но, кылсярысь, 8-тӥ класс ӵапак сыӵе спектакль быръем вал. Ма вераме потэ, ваньзы но тыршизы пуктэм ужпумез быдэстыны, покчи классъёс тужгес но паймытӥзы: кылъёссэс но умой дышетӥллям, рольёссэс но усто шудӥзы. Огъя вераса, Театрлэн арезлы сӥзьыса радъям арня пайдаё ортчиз, со нылпиослы актёрской, творческой быгатонлыкъёссэс усьтыны луонлык но кылдытӥз, валче ужаны но дышетӥз шуыса малпам потэ», — шуэ Алия Шамиловна Мингазова, Покчи Лӧзя шоръёзо школаысь визьнодан ужъёсъя директорлэн воштӥсез. Нылпиослэсь тунсыкъяськон мылкыдзэс ‡утон понна школалэн администрациез спектакль возьматон ужрадэз вожвылъяськон амалэн радъяно карем. Вормисьёсты покчи, шор но бадӟым классъёс пӧлын нимаз бырйыны чаклаллям. «Йылпумъянъёс лэсьтэмын, матысь дыре соос тодмо луозы. Вераны кулэ, дунъет сётыку, ваньмыз лыдэ басьтӥськиз, артистизм но, кылъёсты дышетэм но», — шуэ Алия Шамиловна.  

Реклама

baltasi.ru
Добавить комментарий